لقاء سويدان تكشف كواليس دورها في «سيد درويش»

تواصل الفنان لقاء سويدان عرض مسرحيتها “سيد درويش” بنجاح في موسم جديد بالإسكندرية مجسدة شخصية جليلة العالمة، تلك السيدة التي تزوجت من فنان الشعب سيد درويش.
وكشف لقاء عن كواليس دورها في المسرحية قائلة: “أنا عاملة جليلة، دى عالمة وحب سيد درويش الكبير أوى حب حياته ومراته، وكتب فيها أغانى كتير، وللأسف سابو بعض، وده الدور اللى قدمته هند رستم في الفيلم”.
وأضاف: “جليلة دور مختلف عليا جدا أول مرة أقدمه في المسرح.. أنا عملت استعراضات وغنا، لكن المرة دى دور عالمة دور في جرأة شوية، ناس كتير حست انى غيرت جلدى، قدمت الدور بشياكة ولطافه ومن غير ى ابتذال، فانا حابه أوى سيد درويش كعرض وحابه أوى فكرة جليلة. ”
وعن الفارق بين السينما وخشبة المسرح قالت لقاء سويدان: ” الجمهور هو الفرق، أنا بشوف الناس اللى بحبها وبتحبنى، الناس اللى ادتنى شهرة وحب بدون ما يعرفونى، بحس بنفسهم، فانتى بتاخدى الجايزة بتاعتك في ساعتها، بتاخدى رد الفعل سواء حلو أو مش حلو في ساعتها، الجمهور الحقيقى، ملهاش دعوة بالسوشيال ميديا ولا حد بيتدخل فيها ولا فيها أي لعب، بيجوا يتصوروا معايا بعض العرض انا ببقى في غاية السعادة، إحساس مش قادرة أوصفه، لكن أنا بحس على خشبة المسرح أنى طايره، فالمسرح بالنسبالى حاجة مهمة جدا.
وعن أزمة المسرح، قالت لقاء سويدان : “مبقاش فى أزمة فى المسرح.. رجع القطاع الخاص يقدم عروض حلوة ومهمة ولذيذة.. القطاع العام عمره ما كان متوقف، الدكتورة إيناس عبد الدايم عاملة وزيرة الثقافة شغل هايل.. حتى في وقت كورونا كان في مسرحيات أونلاين على قناة وزارة الثقافة وأنا مشاركة في 3 مسرحيات لوزارة الثقافة .
وتابعت لقاء سويدان:” في عروض كتيرة جدا رغم ظروف كورونا ولكن المسرح واقف على رجلة ويقاوم، والمسرحيين الحقيقة باذلين كل الجهود علشان الحياة تفضل منورة في المسرح .