بهاء الدين محمد يتراجع عن قرار اعتزاله

تراجع الشاعر بهاء الدين محمد عن قرار اعتزاله الذى أعلنه يوم الخميس 5 أكتوبر، ولم يكشف وقتها عن الأسباب التى قادته إلى هذا القرار، ليعود اليوم ويعلن تراجع عن الاعتزال وكشف عن أسبابه.
وكتب بهاء الدين محمد على صفحته على “فيس بوك”: “مهما توقعت أو حسيت أو تخيلت مش حاعرف أوصف إحساسى بكلام يرد بكل احترام على رد فعلكم وفعل زمايلى الفنانين اللى رافضين قرار اعتزالى والتركيز فقط على تأملات فى نِعم الله”.
وأضافت بهاء الدين محمد: “رد الفعل اللى رافض القرار خلانى أسكت وأفهم وأعرف وأشوف بصورة واضحة مدى الحب والتقدير اللى وصلنى من كل مكان وعرفت من خلاله إن ليا مكان ف قلوب من حقهم الرفض، ورد الفعل اللى رافض الاعتزال خلانى أتجاوز اللحظة اللى خليتنى أفكر فى القرار” .
وتابع: “كانت لحظة سخيفة اتجمعت فيها أحداث كتيرة مش حلوة ونفوس وقلوب كلها حقد وسواد وغباء فى الحياة الفنية والشخصية، وكم كبير من ضعف وطمع ناس مش ناس”.
واستكمل: “وأنا مهما قابلت أى هجوم قذر بس حست إنى محتاج هدوء، وحسيت فى لحظة إنى محتاج أعيش لنفسى ومع نفسى بعيد عن أى ظروف تجبرنى على الاحتكاك أو معاملة المرفوضة دين وحياة وأخلاق.. وأنا مش سهل أوصف ناس بالشكل ده “.
وعن كواليس إعلان قرار الاعتزال: “قررت شطب واستئصال كل حد لا يليق ومرفوض، واحتفظت فقط بالناس اللى قلوبهم ونيتهم سليمة فى الفن والحياة، وشكرا على هذا الحب والاحترام اللى حافضل قده وأرد عليه بكل فن، وباشكر كل قلب كتبلى أو بعتلى أو كلمنى يطمن عليا واعتبرته شاركنى ووقف معايا بكل حب ف التجربة دى”.
وأضاف: “ومهم جدا أقول أنا مش بتاع ترندات ولا ظهور إعلامى بالعكس من سنين واخد قرار أعيش فى حالى بعيدا عن الأضواء وأسيب أعمالى فقط فى دايرة الضوء ويكفينى إن كلماتى تعيش وتفضل ناجحه وفى قلوبكم، شكرا من قلبى يا أغلى الناس”.
وكان الشاعر بهاء الدين محمد أعلن اعتزاله، وذلك عبر حسابه على مواقع التواصل الاجتماعى، دون الكشف عن الأسباب التي دفعته لهذا القرار واكتفى بوصف القرار بأنه راجع لأسباب خاصة.